RSS Feed

പ്രണയം

Posted by പാച്ചു


 ഞാന്‍ നിന്നെ പ്രണയിക്കുന്നത് 
നിശബ്ദമായ ഒരു പ്രാര്‍ത്ഥന പോലെയാണ്...
നീയറിയാതെ നിന്നെ പൊതിയുന്ന 
ലോലമായൊരാവരണം പോലെ...
സദാസമയവും നിന്നെ വലം വെക്കുന്ന
ഒരിളംകാറ്റ് പോലെയും !

22 അഭിപ്രായങ്ങള്‍

നിയോഗം

Posted by പാച്ചു

,

നിയോഗം



നീ പിടിവിട്ട കൈകളിൽ
ഏകാന്തതയുടെ മഞ്ഞുറയുന്നു.

എന്റെ മനസ്സിന്റ അനാഥത്വം
എന്നെ ഏകാകിയാക്കുന്നു..

ഉപേക്ഷിക്കപ്പെട്ടൊരു നഗരത്തിന്റെ
വിജനതയിലെന്ന പോലെ
എന്റെ ആത്മാവ് വഴി കറങ്ങുന്നു.

കൈയ്യൊഴിഞ്ഞ പ്രണയവും
പിടിവിട്ട കിനാക്കളും 
എന്റെ പിഴയായ്, ശിരോലിഖിതമായ് 
എന്നെ വേട്ടയാടുന്നു.

ഒരു ചിരിയിൽ 
ഉള്ളിലെ നൊമ്പരങ്ങളുറക്കി 
ഞാൻ സ്വയമോതുന്നു... 
“നിയോഗം”

29 അഭിപ്രായങ്ങള്‍

മൌനം പറയുന്നത്

Posted by പാച്ചു


മൌനം പറയുന്നത് 


എന്റെ നിറഞ്ഞ വാചാലതകള്‍ക്കിടയിലും
കനത്ത മൌനത്തിന്റെ ഇടനാഴികളുണ്ട്.
എന്റെ വിരിഞ്ഞ പുഞ്ചിരിക്കിടയിലും 
ഖനീഭവിച്ച ദു:ഖത്തിന്റെ വിരല്‍പ്പാടുകളുണ്ട്.

വാക്കുകളുടെ ചിറകൊടിയുമ്പോള്‍ 
ചിരിയുടെ നിറം മങ്ങുമ്പോള്‍
ഓര്‍മ്മകളുടെ ചിതല്‍പ്പുറ്റിലേക്ക് 
ഞാന്‍ നുഴഞ്ഞു കയറുന്നു.

മൌനത്തിന്റെ ചത്ത വിത്തുകള്‍ അവിടെയുപേക്ഷിച്ച്
പുതിയ ചിന്തകളുടെ മൊഴിത്തിളക്കവുമായി 
വർത്തമാനത്തിലേക്കു ഞാൻ തിരികെയെത്തുന്നു.

24 അഭിപ്രായങ്ങള്‍
Subscribe to: Posts (Atom)